Krav Maga Schoul – Intuitioun stäerken, bewosst handelen
Et ginn Kampfsportaarten, déi virun allem de Kierper forméieren, an anerer, déi d’Haltung schäerfen. D’Schoul vum Richard Seiwerath zu Esch geet wäit iwwer de physeschen Aspekt eraus. Hei geet et ëm Selbstschutz, Intuitioun, Verantwortung an ëm eng Philosophie vu Fridden duerch Kloerheet.
Sech kënne schützen
De Richard huet net als Sportler ugefaangen, mee als Mënsch mat engem Gefill: Ech muss mech kënnen am Noutfall schützen. Hien huet deemools an enger Stad gelieft, wou d’Kriminalitéit an d’Luucht gaangen ass. „Ech hunn mir gesot: ech brauch kee Sport, ech brauch e System – direkt, realistesch, effikass.“
Esou huet hien Krav Maga entdeckt: e Selbstverdeedegungssystem, entwéckelt fir d’Strooss, net fir d’Show. No ville Jore vu Formatioun beim Alexander Vanderlinden, Jean-Michel Lehro an dem verstuerwene Thierry Viatour, gouf hien 2008 Instrukter, 2023 5. Dan, an 2025 techneschen Direkter vun der World Krav Maga Federation zu Lëtzebuerg.
Training fir realistesch Situatiounen
D’Schoul bitt Coursen un fir jiddereen ab 16 Joer, egal ob Mann oder Fra, Ufänger oder Leit mat Erfarung. Um Programm: déi realistesch Selbstverdeedegung an Alldagssituatiounen, d’Verdeedegung géint Gräifen, Schloen, Waffen, d’Kontroll vum Stress an d’Entwécklung vun der Intuitioun souwéi gesond Beweegung an Training fir de Kierper ze stäerken.
Beim Training geet Sécherheet ëmmer vir: mat Mondschutz, Grappling- a Boxhandschoner, Schëllerschoner, Coquillen, Knéi- a Broschtschutz.
Kierperleche Training, mental Kloerheet
Fir de Richard geet et net drëms, Techniken blann unzeléieren. „De System gëtt der heiansdo méi wéi dat, wat d’Gesetz zouléisst – mee et ass un dengem Moralkompass, net doriwwer erauszegoen.“ Et gëtt betount, dass proportional Reaktioun am Noutfall dat Wichtegst ass. Et geet drëm, net de Kapp ze verléieren, mee mat Kloerheet a Konzentratioun virzegoen.
„Déi bescht Verdeedegung ass d’Distanz. Wann s de kanns fortlafen, da laf! Wann s de d’Situatioun erkenns, ier se ausbrécht, da bass de schonn zweemol am Virdeel.“
Struktur, Respekt an eng gemeinsam Approche
Dem Richard seng Coursen sinn esou opgebaut, dass nei Memberen integréiert ginn, ouni iwwert hir eege Grenzen eraus gepusht ze ginn. D’Gruppe gi flexibel ugepasst, sou dass jidderee säi Rhythmus fënnt. Et gëtt kee Konkurrenzgefill, just e gemeinsame Wuesstem. Bei all Beweegung geet et ëm Kloerheet – net ëm Dominanz.
Et gëtt och besonnesch Opmierksamkeet op psychesch Blockaden: Angscht viru Kierperkontakt, Stress, al Gewunnechten. All dëst gëtt lues a lues ugeschwat an iwwerwonnen. „Säit der Pandemie meide vill Leit de physesche Kontakt mat anere Mënschen. Mee mir si relational Wiesen. A mengem Cours léiert een, sech géigesäiteg ze beréieren, seng Maske falen ze loossen an trotzdeem Respekt vis-à-vis vuneneen ze behalen.“
Eng Schoul mat Wuerzelen zu Esch
De Richard ass gebiertegen Escher, an dat verbënnt hien och mat senger Schoul. Hie seet:
„Do, wou ee gebuer ass, ass ee verwuerzelt. Hei sinn ech opgewuess, hei sinn ech doheem.“
Hie gesäit seng Schoul net just als Sportcours, mee als Raum fir Gemeinschaft, Austausch a Vertrauen. Krav Maga als Haltung, net als Waff.
Méi wéi just eng Technik
Fir hien ass Krav Maga eng Philosophie: Sécherheet duerch Virsiicht, Kloerheet duerch Training, Fridden duerch Kraaft. Et ass kee martialescht Ego-Spill, mee eng Konscht, fir sécher duerch d’Liewen ze kommen. Wéi de Grënner Imi Lichtenfeld gesot huet: „Ech wëll net, dass dir kämpft. Ech wëll, dass dir a Fridde goe kënnt.“
De Richard erkläert säi Konzept follgendermoossen: „Wëlls de dech méi sécher fillen, deng Intuitioun stäerken an eng nei Aart vum Training entdecken? Da fënns de an dëser Schoul net nëmmen Techniken – mee eng ganz nei Aart ze denken.“
