Gesellschaftsspiller, Quizzer, Puzzelen oder Rollespiller: Bei de Minettsdäpp gëtt et vill verschidde Méiglechkeeten, fir ze spillen. Mee et kann een och einfach e Kaffi drénken, duerch e Comic bliederen oder sech eng kleng Paus vum Alldag gënnen.
D’Gérante Jacqueline Poupart erzielt eis, wéi d’Iddi entstanen ass a wéi sech de Café iwwer d’Joren entwéckelt huet.
Vun der Iddi zum Spillcafé
Den Numm verréit schonn e bëssen eppes iwwer d’Iddi hannendrun. Bei de Minettsdäpp ass eng Bezeechnung fir d’Awunner aus dem Süde vum Land. Mee Dapp kann och op en Dillendapp hiweisen – e Numm, deen also gutt bei e Spillcafé zu Esch passt.
Dass de Projet zu Esch entstoe sollt, war séier kloer. D’Jacqueline wunnt hei, an och d’Equipe hannert dem Café huet sech scho virdru reegelméisseg zu Esch fir gemeinsam Spillowender getraff. Esou ass d’Iddi entstanen, eng eege Plaz ze schafen, wou d’Leit zesummekommen, nei Spiller entdecken an hir Passioun fir d’Spillen deele kënnen – an dat an engem Kader, deen oppe fir jiddereen ass.
Am Februar 2022 war et dunn esou wäit: „Bei de Minettsdäpp“ huet seng Dieren opgemaach. Am Ufank stoungen haaptsächlech Gesellschaftsspiller a Pop-Quizzer um Programm. Zënterhier ass d’Offer ëmmer méi grouss a villfälteg ginn.
1.200 Spiller – wou soll een ufänken?
Haut besteet d’Sammlung aus ronn 1.200 Spiller: Spiller fir Kanner, fir zwee Leit, gréisser Gruppe, fir Ufänger, awer och fir déi, déi schonn e bësse méi Erfarung hunn. Verschidde Spiller si séier erkläert a gespillt, fir anerer muss ee sech e bësse méi Zäit huelen.
Wärend den Ëffnungszäite kënnen d’Visiteuren d’Spiller vum Café gratis ausprobéieren. A bei enger Auswiel vun 1.200 Spiller ass et net ëmmer einfach, sech ze entscheeden. D’Equipe beréit d’Gäscht dofir gären an hëlleft hinnen, e Spill ze fannen, dat bei si passt. Heiansdo sinn och fräiwëlleg Game Masters do, déi d’Reegelen erklären an déi eng oder aner Recommandatioun ginn.
Genau dat ass och ee vun de Grondgedanke vum Lokal: nei Spiller entdecken an ausprobéieren, ier ee sech eventuell entscheet, se selwer ze kafen. D’Sammlung wiisst dobäi ëmmer weider, duerch nei Spiller, Recommandatiounen, awer och duerch Spenden. A fir datt d’Spiller weider zirkuléieren, organiséiert “Bei de Minettsdäpp” all Joer e Maart fir Occasiounsspiller.
Méi wéi just Gesellschaftsspiller
Zënter der Ouverture ass och d’Offer un Aktivitéiten ëmmer méi grouss ginn. Nieft de Pop-Quizzer, déi et schonn zënter dem Ufank gëtt, stinn haut och Schachturnéieren, Puzzeldeeg, Murder-Mystery-Owender a Karaokesowender um Programm. Esou ass mëttlerweil bal all Woch eppes lass.
Och d’Frënn vu Rollespiller treffe sech reegelméisseg fir verschidde Spiller, ënner anerem Dungeons & Dragons. Donieft huet nach eng aner Gemeinschaft hire Wee bei d’Minettsdäpp fonnt: d’Fans vun Trading Card Games. Pokémon, Yu-Gi-Oh!, Magic oder One Piece bréngen all Woch Spiller bei verschiddenen Turnéieren zesummen.
Gespillt gëtt awer net nëmmen am Café. „Bei de Minettsdäpp“ bitt och Team-Building-Aktivitéiten un a kënnt dofir an Entreprisen, Schoulen oder op Evenementer. Wie léiwer selwer eppes organiséiere wëll, kann de Lokal och fir eng eege Soirée reservéieren.
Eng Paus vum Alldag
Och wann d’Spiller eng wichteg Roll spillen, muss een net nëmmen dofir heihi kommen. De Café soll och eng Plaz sinn, wou ee sech gemittlech nidderloosse kann, eng Paus mécht an einfach e bëssen Zäit verbréngt.
„Et ass eng Plaz, wou Evenementer stattfannen, wou ee sech erhuele kann an, an engem gewësse Sënn, och eng Plaz fir säi Wuelbefanne“, erzielt eis d’Jacqueline.
Et kann een also fir eng Partie laanschtkommen, mee genau esou gutt e Kaffi drénken, duerch e Comic bliederen oder einfach gemittlech sëtzen. Jidderee kann d’Plaz op seng Manéier genéissen – mat oder ouni Spill um Dësch.
Fir de klengen Honger gëtt et och eppes z’iessen: Croque-Monsieur, och an enger veganer Versioun, Pizzaen, déi een no sengem Goût zesummestelle kann, oder e Stéck Kuch. Genuch also, fir eng Partie, en Owend mat Frënn oder eng gemittlech Kaffispaus nach e bëssen ze verlängeren.
Eng Gemeinschaft, déi ronderëm d’Spillen entstanen ass
Iwwer d’Jore gouf “Bei de Minettsdäpp” zu engem Treffpunkt fir eng Gemeinschaft vu Spiller a reegelméissege Gäscht. E puer Leit sinn zënter dem Ufank dobäi. Verschidde Cliente si mëttlerweil souguer fräiwëlleg Game Masters ginn a deelen hir Spiller, hir Rotschléi an hir Passioun mat den anere Visiteuren.
Dës Gemeinschaft passt schlussendlech ganz gutt zum Charakter vum Café: eng Plaz, wou een net nëmme spille kënnt, mee och Leit kenneléiert, sech austauscht an eng flott Zäit zesumme verbréngt.
Oder, wéi d’Jacqueline et selwer zesummefaasst: „Dir musst heihinner kommen, d’Plaz gesinn an d’Erfarung selwer maachen, fir et wierklech ze verstoen”.
Also, wéi wier et mat enger Partie bei de Minettsdäpp?
